Gülüstan sülh müqaviləsindən 200 il keçir
| Gülüstan sülh müqaviləsindən 200 il keçir |
| Tarix: 12.10.2013 | Saat: 13:20:00 | E-mail | Çapa göndər |
 
Bu gün Azərbaycan tarixində ən ağrılı hadisələrdən birinin -
torpaqlarımızın Rusiya və İran arasında bölüşdürülməsinin əsasını qoyan
“Gülüstan” sülh müqaviləsinin imzalanmasının 200 ili tamam olur.
1813-cü
il, oktyabr ayının 12-də Rusiya ilə İran arasında Qarabağın Gülüstan
kəndində Azərbaycanın parçalanmasına yol açan 11 bəndlik sülh anlaşması
imzalanıb. Tarixə “Gülüstan” sülh müqaviləsi adı altında düşən bu
anlaşmaya əsasən, Şimali Azərbaycan xanlıqlarından Lənkəran, Şirvan,
Quba, Bakı, Gəncə, Qarabağ, Şəki və Dərbənd Rusiyanın işğalı altına
keçib. Bununla da İran və Rusiya tərəfindən qədim Azərbaycan
torpaqlarının hissə-hissə parçalanmasının və millətimizin yox edilməsinə
yönələn çirkin bir siyasətin həyata keçirilməsinin əsası qoyulub. Onu
da deyək ki, iki böyük işğalçı dövlət arasında imzalanan “Gülüstan” sülh
anlaşmasından əvvəl Azərbaycanın ümumi ərazisi 410 min kvadratkilometr
olub. Azərbaycan torpaqlarının parçalanmasına xidmət edən bu biabırçı
sülh anlaşması barədə Abbasqulu Bakıxanov “Gülüstani-İrəm” adlı əsərində
belə yazıb: “Həmin ilin baharında (1813-cü il) İran dövləti ruslar
tərəfindən alınan ölkələri geri qaytarmaqdan naümid oldu. Rum (Osmanlı)
barışığı və Xorasanda baş verən iğtişaş nəticəsində şah barışığa meyil
göstərdi. Mirzə Əbülhəsən xan Şirazi İran dövləti tərəfindən vəkil
edildi. Sərdar Ratişşev də gəldi. Qarabağın Gülüstan adlı yerində, hicri
1228-ci (1813) ildə, təşrin-əvvəl (oktyabr) ayının 12-də Rusiya və İran
dövlətləri arasında əhdnamə bağlandı”. Bu müqavilədə Azərbaycanın adı
çəkilməyib. Çünki torpaqlarımızı öz aralarında bölüşdürən bu iki
təcavüzkar dövlət Azərbaycan adının çəkilməsinin gələcəkdə bu torpağın
əsl sahiblərinin öz haqlarını müdafiə üçün ayağa qalxacağından ehtiyat
etmişdilər. Beləliklə, 12 oktyabr dövlətçilik tariximizdə, xalqımızın
həyatında ən faciəli gündür. Azərbaycan xalqı bu faciədən ibrət dərsi
götürməli, tarixboyu bunu unutmamalıdır. Bunu bizim gələcəyimiz, milli
varlığımızı qoruyub saxlaya bilməyimiz tələb edir.
Teleqraf.com
|
| Xəbər 35 dəfə oxundu |
Комментарии
Отправить комментарий