Almaniya Bundestaqının üzvü: “Ermənistan işğal olunmuş ərazilərdən geri çəkməlidir“

Almaniya Bundestaqının üzvü: “Ermənistan işğal olunmuş ərazilərdən geri çəkməlidir“

Tarix: 02.07.2013 | Saat: 14:41:00 | E-mail | Çapa göndər

“Almaniya Ermənistan-Azərbaycan Dağlıq Qarabağ münaqişəsinə dair BMT Təhlükəsizlik Şurasının qəbul etdiyi məlum 4 qətnaməni dəstəkləyir”. Avropa Azərbaycan Cəmiyyətindən (AAC) Teleqraf.com-a verilən məlumata görə, bu fikirləri Almaniya Xristian Demokratik İttifaqının parlamentdəki deputatı, Xarici İşlər Komitəsinin üzvü Hartviq Fişer AAC-ın Ermənistan-Azərbaycan Dağlıq Qarabağ münaqişəsinə dair sorğusuna cavabında deyib.   “Dağlıq Qarabağın Ermənistan tərəfindən işğalı dəfələrlə BMT Təhlükəsizlik Şurası tərəfindən bəyan edilib və bu beynəlxalq hüququn pozulması deməkdir. “Dağlıq Qarabağ respublikası”nın elan olunması faktı da heç zaman beynəlxalq ictimaiyyət tərəfindən qəbul olunmayıb.  Hər bir dövlətin öz ərazi bütövlüyünü bərpa etmək hüququ var. Azərbaycan torpaqlarının 20 faizi erməni  silahlı qüvvələri tərəfindən işğal olunub. Həmin ərazilərdən zorla çıxarılmış və ya silahlı qarşıdurma zamanı o əraziləri tərk etmək məcburiyyətində qalmış insanların öz evlərinə qayıtmaq hüququ var”.   Cənab Fişer bildirib ki, Azərbaycan ilə Ermənistan arasındakı münaqişənin həllinə regional kontekstdə baxmaq lazımdır: “Əgər bu ölkələr arasında atəşkəs həqiqi sülhə çevrilmirsə, deməli, bütünlüklə  Cənubi Qafqazın təhlükəsizliyi və stabilliyi təhlükə altındadır. Ən əsas prioritet isə BMT Təhlükəsizlik Şurasının qətnamələrinin həyata keçirilməsidir. Buna görə də ilk addımı Ermənistan atmalı və silahlı qüvvələrini işğal olunmuş ərazilərdən geri çəkməlidir. Almaniya münaqişə tərəflərini danışıqlar masası arxasında dialoqu davam etdirməyə bir daha dəvət edəcək. Son zamanlar Ermənistanın Xocalı aeroportunu hava nəqliyyatı üçün açmağa cəhd göstərməsi vəziyyəti daha da gərginləşdirib. AŞPA tərəfindən haqlı olaraq pislənilən Ermənistanın sülh prosesinə təhlükə hesab olunan bu hərəkətləri ilə özünün Dağlıq Qarabağa olan iddialarını pərdələməyə çalışır”.

Xəbər 30 dəfə oxundu